Me atlete, apo pa atlete ne teater...kjo eshte ceshtja!

Sot do të flas për etikën në të veshur, jo si specialiste, por si qytetare. Frymëzimin e mora nga mbasditja e djeshme, të cilën vendosa t’a kaloj në teatër. Në përgjithësi përpiqem gjithmonë që veshjen t’ja përshtas vendit ku shkoj. Besoj se kjo është A-ja e qytetarisë për këdo. Mund të vishem bukur, mund të vishem shëmtuar, mund të vishem mirë, mund të vishem shumë mirë, ose shumë keq, ama nuk mund të stonoj  me ambjentin ku shkoj. Kështu psh në palestër nuk mund të shkoj e veshur me xhinse (po, po, kam parë dhe kështu), ashtu si në teatër nuk mund të shkoj e veshur me tuta (po, po, pash edhe kështu). Ekziston një kod në të veshur, të cilin edhe nëse nuk e respetojmë gjithmonë me riogorozitet dhe përpikmëri, të paktën nuk duhet ta injorojmë totalisht. Për asnjë arsye! As për t’u dukur si menefregiste dhe snob, as për t’u dukur më e lirshme dhe moskokcarëse seç duhet dhe as sepse nuk ke patur kohë të bëhesh gati përpara. Unë mendoj se nuk ka arsye që të të “detyrojë” të shfaqesh në teatër e veshur me tuta, apo me xhinse të grisura dhe atlete të palara. Më fal por kjo është e papranueshme. Dhe dje me të vërtet që u habita, kur pash që kishte edhe kështu.

Nuk duhet shumë mund, e shumë mend, për të gjetur një veshje të përshtatshme, as shumë të ekzagjeruar (po, po, kishte dhe fustane me temina dhe xixa), por as shumë kam-një-javë-që-s’kam-uji-prandaj-nuk-jam-larë-dhe-nuk-jam-veshur…Më poshtë po shkruaj disa nga rregullat bazë, që duhet të kemi parasysh, të gjithë ne, kur shkojmë në teatër (kuptohet që këto nuk i shpika unë, se nuk jam aq e zgjuar :P)

-         Gjeni diçka casual, por elegente në të njëjtën kohë. Nëse dikush ju thotë casual, kjo nuk do të thotë gjithmonë, xhinse, një t-shirt dhe atlete. Nëse jeni tip që ju pëlqen thjeshtësia dhe nuk ju pëlqen të “pispilloseni” shumë, të paktën vishni diçka që të tregojë respekt për vendin ku po shkoni. Psh vajzat mund të zgjedhin një fund, të kombinuar me një bluzë, ose këmishë dhe këpucë me taka. Rëndësi ka që veshjet të jenë të pastra.

-         Kontrollojeni veten se mos jeni më shumë seç duhet e ngarkuar për këtë event. Rëndësi ka të dukeni mirë, por jo sikur po kërkoni me zor të tërhiqni vëmendjen.

-         T-shirt me logo, apo figura, më mirë lërini për një tjetër rast, sepse do të stononin me vendin ku jeni duke shkuar.

-         Vendosni një bizhu që të tregojë klas: perla, varse të holla, unaza fine. Të dukesh elegante, I shkon përshtat atmosferës së teatrit.

-         Lani dhe stiloni flokët. Qoftë të krehur, qoftë të kapur, rëndësi ka të mos dukeni si kokëpalarë.

-         Sigurohuni që të keni zgjedhur veshje të përshtatshme. Nuk jeni në një sfilatë mode, do t’ju duhet të rrini ulur për dy orë, kështu që vishni diçka të rehatshme, por gjithmonë duke ruajtur një farë elegance.

-         Mos vishni diçka që të tërheqi vëmendjen, gurët, xixat, teminat dhe gjithcka e ekzagjeruar është më mirë të lihen për ndonjë mbrëmje në klub. Njerëzit e tjerë kanë ardhur të shohin shfaqen, jo ju.

E shikon sa pak mjafton, për të patur një prezencë të kënaqshme dhe mbi të gjitha në përshtatje me vendin ku po shkoni? Do të doja shumë të dija dhe  mendimin tuaj në lidhje me këtë temë. Respektohet dress code në vendin tonë? Ka patur ndonjë rast kur keni menduar se veshja e dikujt ka qenë totalisht e papërshtatshme për vendin? Po ju vetë jeni ndjerë ndonjëherë keq për veshjen që keni zgjedhur për një event të cakuar?

Veshja që unë kisha dje, ishte diçka e thjeshtë, një fund (që ma keni parë të veshur edhe ketu), këmisha (që kam veshur edhe ketu) dhe  xhaketa, të cilat kombinonim me lulet e fundit dhe një palë këpuce me taka.