Samara wanna be :D

Gjithe jeten time, nje nder endrrat me te medha qe kam patur ka qene te kisha floket e drejta dhe te gjata, shuuume te gjata, aq te gjata sa Samara te filmi "The ring" :D. Kohe me pare, kur isha ende e re :P, kisha dhe une floke te dendur, me onde te bukura dhe shume te shendetshem, deri kur ne moshen 15 vjecare njoha bojen dhe hekurin e hekurosjes...Dmth, une hekurin e njihja dhe e dija qe ai hekuroste rroba, por kur ne adoleshence zbulova se me hekur mund te hekuroseshin edhe floket (mbi te gjitha floket), m'u duk sikur zbulova parajsen. Per te kuptuar vetem disa vite me vone qe, ajo "parajse" ishte rruga qe do te me conte drejt "ferrit".

Sot, qe jam 27 vjece, kam me shume tru ne koke (por me pak floke), mund te them qe une jam sjelle ne nje menyre, shume, shume te keqe me floket e mi. Kjo sjellje perkon me periudhen e adoleshences dhe rinise se hershme, deri nga mosha 21 vjec. Per here te pare i kam lyer floket pak para se te mbushja 16 vjece. Ju luta, ju pergjerova, qava, kercenova, e nuk e di c'metoda te tjera perdora, qe ti mbushja mendjen mamit qe te me linte t'i lyeja vetem me dy fije te kuqe. Ne fund ajo u dorezua! Une vajta i leva te nje kusherira jone, vetem se fijet ishin paaaak me shume te trasha nga sa i kisha shpjeguar une mamit dhe nga sa i kishte imagjinuar ajo. Fijet ishin te tilla, qe po ti bashkoje te dyja bashke, behej shuma e gjithe fijeve te flokeve qe une kisha ne koke :D Qe nga ai momenti, koka ime i provoi te gjitha ngjyrat e ylberit. Pasi i mbajta disa kohe me "fije" te kuqe, i leva te gjitha kafe te hapur, pastaj ngjyre mjalti, pastaj i futa disa fije jeshile, blu, roze, portokalli, lejla (keto te gjitha ne te njejten kohe), pastaj vendosa t'i beja te zeza sterr, pastaj nero blu, pastaj kalova direkt te e kuqja. Te e kuqja bera nje pit stop te gjate. I mora me radhe te gjitha nuancat e te kuqes, nga ajo e zjarrta fare (prej se ciles shume vone e kuptova perse kudo ku isha une do kishte dhe ndonje zjarrefikes afer :P), te patellxhani, te portokallia, karrota (karrote e fresket dhe e prishur), et, etj. Te gjitha keto ndryshime me nje interval prej tre deri kater jave. Ah dhe tmerri i tmerreve ishte qe, boja qe zgjidhja per t'i lyer ishte Palette, e cila asokohe kushtonte vetem 2000 leke (te vjetra). Zgjedhja kuptohet nuk behej prej cmimit, por sepse Palette kishte nuancat me te jashtezakonshme te se kuqes, qe as bojrat me te shtrenjta nuk i kishin. 

Dhe keshtu zgjati nja 6 vjet te mira odisea ime me ngjyrat dhe modelet e flokeve, per stilimin e se cileve vazhdonte nje ndihme te madhe te ma jepte hekuri. Derisa nje dite te bukur kuptova qe....kisha mbetur pa floke!

Ketu fillon dhe kalimi, nga parajsa te ferri. Pasi, me ne fund, u ndergjegjesova qe e kisha tepruar vertet dhe se po te vazhdoja me ate ritem, do te kisha probleme serioze ne te ardhmen, vendosa te heq dore per pak kohe dhe mos t'i lyeja me floket. I bera ne ngjyren time natyrale, i preva shume te shkurtra dhe i lash te me rigjeneroheshin me shpresen se do te me ktheheshin serish si dikur. Vitet kaluan, por floket nuk u shtuan. Sikur te mos mjaftonte kjo per te me "nxire jeten", por mbi te gjitha sikur mos te mjaftonte fjalia e mamit "ta kisha thene", qe u be refren i mengjeseve, darkave dhe drekave te mia, shkoj dhe mbaj nje diete te shkurter (te paren dhe te vetmen ne jeten time) qe ndikoi ne nivelin e hekurit ne gjak, duke ma ulur shume. Dhe keshtu, nje dite te bukur e gjej veten pa hekur dhe pa floke ne trup :P Duke i lene shakate menjane, e kam vuajtur vertet ate periudhe... Kot nuk thone qe floket jane gjysma e bukurise se njeriut dhe duke qene vete nje njeri me gjysem bukurie, hiq ketu dhe pjesen e bukurise se flokeve, imagjinoni cfare tmerri isha ne ate periudhe :D Pervec faktit qe bojes se flokeve nuk doja t'i degjoja me emrin, e jo ta shihja me sy, hoqa dore dhe nga shume gjera te tjera. Hekuri padyshim qe u thye nga inati :P, piaster, tharese, difuzor, llak flokesh, xhel, madje dhe shkume, nuk u perdoren per nje kohe te gjate. Mora disa preparate nga goja, por edhe disa ampula, derisa gjendja filloi te permiresohej disi. Gjithesesi demi qe ishte shkaktuar, nuk eshte riparuar me as sot e kesaj dite. Edhe pse kam me shume se pese vjet qe nuk i lyej, tashme e kam mbledhur mendjen, floket e gjate dhe te dendur te Samares nuk do t'i kem kurre.

Kjo eshte dhe arsyeja perse une, pavarsisht se me pelqejne shume dhe do t'i mbaja vetem ashtu, i drejtoj shume rralle floket. Ne jeten e perditshme i mbaj gjithmone kacurela, ose te kapura. Vetem ne ato raste kur me duhet te dale ne ekran, zgjedh t'i drejtoj dhe meqe gjatesia dhe dendesia e flokut tim s'me pelqen, zgjedh qe ndonjehere te vendos extensions. Ka shume qe me pyesin perse nuk i mbaj edhe ne jeten e perditshme, por une perfundimisht jam nje njeri totalisht anti extensions.

Dhe meqe dje, ngaqe ashtu ishte nje muhabet :P, u "detyrova" t'i drejtoj, zgjas dhe "zgjeroj" :P floket, nuk mund te humbja rastin pa bere disa foto, bashke me "autfitin" perkates:P